హైదరాబాద్, ఆగస్టు 12: బీసీ మహిళలను ఆర్థికంగా బలోపేతం చేసే దిశగా తెలంగాణ ప్రభుత్వం మరో కీలక అడుగు వేస్తోంది. రేపు (ఆగస్టు 13) నుంచి కొత్త పథకానికి అధికారికంగా శ్రీకారం చుట్టనున్నారు. రాష్ట్ర సచివాలయంలోని డా. బి.ఆర్. అంబేద్కర్ సచివాలయం జీ-29లో గురువారం మధ్యాహ్నం 12 గంటలకు మంత్రి పొన్నం ప్రభాకర్ ఆధ్వర్యంలో ఆటోమేటిక్ కుట్టు మెషీన్ల పంపిణీ పథకం ప్రారంభోత్సవం జరగనుంది. ఈ పథకం కింద రాష్ట్రంలోని 119 శాసనసభ నియోజకవర్గాల్లో ఒక్కో నియోజకవర్గానికి వెయ్యి చొప్పున మొత్తం 1,19,000 ఆటోమేటిక్ కుట్టు మెషీన్లు బీసీ మహిళలకు అందించనున్నారు.
కుట్టు వృత్తిపై ఆసక్తి, నైపుణ్యం ఉన్న పేద, నిరుద్యోగ బీసీ మహిళలకు ఈ మెషీన్లు 100 శాతం ప్రభుత్వ సబ్సిడీతో ఇస్తున్నారు. లబ్ధిదారులపై ఎలాంటి ఆర్థిక భారం పడదు. దీని వల్ల ఇంటి వద్దే కుట్టు పనులు చేసుకుని స్వయం ఉపాధి సాధించే అవకాశం మహిళలకు లభించనుంది. ప్రభుత్వం మహిళలను కేవలం లబ్ధిదారులుగా కాకుండా ఆదాయం సంపాదించే స్వయం ఉపాధి మహిళలుగా, భవిష్యత్తులో మహిళా పారిశ్రామికవేత్తలుగా తీర్చిదిద్దాలని లక్ష్యంగా పెట్టుకుంది. బీసీ సంక్షేమ శాఖ ద్వారా ఈ పథకం అమలవుతుంది. తెలంగాణ బ్యాక్వర్డ్ క్లాసెస్ కోఆపరేటివ్ ఫైనాన్స్ కార్పొరేషన్ ద్వారా అమలు చేయనున్నారు. దరఖాస్తులు తీసుకుని జిల్లా కలెక్టర్ల ఆధ్వర్యంలో పారదర్శకంగా లబ్ధిదారులను ఎంపిక చేస్తారు.
రేపటి Sewing Machine Scheme ప్రారంభోత్సవ కార్యక్రమంలో మంత్రి పొన్నం ప్రభాకర్ పథకం విధివిధానాలు, కేటాయించిన బడ్జెట్, లబ్ధిదారుల ఎంపిక ప్రక్రియ, అర్హతలు, దరఖాస్తు విధానం తదితర పూర్తి వివరాలను వెల్లడించనున్నారు. ముఖ్యమంత్రి రేవంత్ రెడ్డి ఆదేశాల మేరకు బలహీన వర్గాల మహిళల జీవనోపాధి అవకాశాలు మెరుగుపరిచేందుకు ఈ నిర్ణయం తీసుకున్నట్లు మంత్రి ఇప్పటికే స్పష్టం చేశారు. బీసీ మహిళల ఆర్థిక స్వావలంబన కోసం ప్రభుత్వం తీసుకుంటున్న చర్యల్లో ఇది ఒక ముఖ్యమైన భాగం. రేపటి కార్యక్రమంతో పథకం అధికారికంగా ప్రారంభమవుతుంది.
